ກອງປະຊຸມໃຫຍ່ຜູ້ແທນອົງຄະນະພັກແຂວງຈຳປາສັກ ຄັ້ງທີ VIII ສຳເລັດຢ່າງຈົບງາມ

ກອງປະຊຸມໃຫຍ່ ຜູ້ແທນອົງຄະນະພັກ ແຂວງຈຳປາສັກ ຄັ້ງທີ VIII ໄດ້ໄຂຂຶ້ນ ແລະ ດໍາເນີນ ແຕ່ວັນທີ 29 ຕຸລາ ແລະ ປິດລົງວັນທີ 30 ຕຸລາ 2020ທີ່ນະຄອນປາກເຊ, ແຂວງຈຳປາສັກ;  ມີຜູ້ແທນສົມບູນໃນທົ່ວແຂວງຈໍາປາສັກ ເຂົ້າຮ່ວມ 410 ສະຫາຍ, ຍິງ 44 ສະຫາຍ ທີ່ເປັນຕົວແທນໃຫ້ແກ່ບັນດາສະຫາຍສະມາຊິກພັກທັງໝົດ 27.311 ສະຫາຍ, ຍິງ 6.686 ສະຫາຍ. ກອງປະຊຸມໃຫຍ່ ມີຄວາມເປັນເອກະສັນຮັບຮອງເອົາ ທິດທາງ ແຜນພັດທະນາເສດຖະກິດ - ສັງຄົມ 5 ປີ ຄັ້ງທີ IX (2021-2025), ໄດ້ພ້ອມກັນໃຊ້ສິດປະຊາທິປະໄຕ ປ່ອນບັດເລືອກເອົາຄະນະ ບໍລິຫານງານພັກແຂວງ ຊຸດໃໝ່ໄດ້ 39 ສະຫາຍ, ຍິງ 04 ສະຫາຍ. ກອງປະຊຸມຄັ້ງປະຖົມມະລຶກ ຂອງຄະນະບໍລິຫານງານພັກແຂວງຈຳປາສັກ ສະໄໝທີ VIII ໄດ້ພ້ອມກັນໃຊ້ສິດເລືອກເອົາ ຄະນະປະຈໍາພັກແຂວງ13 ສະຫາຍຍິງ, 1 ສະຫາຍ, ໃນນັ້ນເລືອກເອົາ  ສະຫາຍ ປອ ວິໄລວົງ ບຸດດາຄຳ ເປັນ ເລຂາຄະນະບໍລິຫານງານພັກແຂວງ, ສະຫາຍ ມະໄລທອງ ກົມມະສິດ ແລະ ສະຫາຍ ສາຍທອງ ໄຊຍະວົງ ເປັນຮອງເລຂາຄະນະບໍລິຫານງານພັກແຂວງ.

ກ່ອນໄດ້ຮັບການແຕ່ງຕັ້ງເປັນເລຂາ - ເຈົ້າແຂວງແຂວງ ຈຳປາສັກແຕ່ ເດືອນເມສາປີ 2020, ສະຫາຍ ປອ ວິໄລວົງ ບຸດດາຄຳ ເປັນກຳມະການສູນກາງພັກ, ສະມາຊິກສະພາແຫ່ງຊາດ, ປະທານກຳມາທິການການເງິນ - ງົບປະມານ ແລະ ການກວດສອບສະພາແຫ່ງຊາດ, ປະທານສະມາຄົມມິດຕະພາບລາວ - ຫວຽດນາມ.